Alzada a tera
Tl’alzada a tera él da ciafé l’entrada, en local por seminars y por mangé, na picia stüa, la ciasadafüch, na ciamena da un en let por jënt cun debojëgns fisics particolars y i tlosec. Tla pert doía é posizioná le tiac dala lëgna y i locai tecnics.
Local por seminars
Tla plü bela pert dla „Ütia de Pütia“, cuntra süd, él da ciafé en gran local de 50 qm, che vëgn adoré sciöche local por fá seminars y local da sté a mangé por alplü 40 porsones. Le scialdamënt te funz y n furn a „pellets“ porta ite na atmosfera da sté saurí. Les gran finestres sön trëi perts cun odüda sön le crëp de Pütia, lascia ite na bela löm naturala.
Dl aredamënt fej pert na picia biblioteca, beamer y linzó por proieziuns, en parëi de sugher sciöche ince 3 “flipchart” por tigní seminars y cursc.
Stüa
Na picia stüa cun mogun a „pellets“ y na bela mësa sciöche post da fá sentades o se trá zoruch por fá le resocunt dl de passé y la programaziun di dis che vëgn.
Ciasadafüch
La ciasadafüch cun odüda sön le crëp de Pütia y sön la plaza alalêria, é aredada te na manîra scëmpla, funzionala y da sté saurí. Cujiné vëgnel cun fanes a induziun o sön en frogoré a lëgna. Chësc é ince da impié sö, sce an ô avëi ega cialda da cujiné, da fá la duscia o le scialdamënt d’invern. La lëgna é a desposiziun te tiac.
La ciasadafüch é dotada de furn, frescara y dlaciara. Döt ci che vá debojëgn por cujiné y mangé (fanes, taís, pestech, goti…) é danman por 40 porsones. Döt le material de consum (mangé, netijia, imondizies…) é da se porté dô y se tó para ala fin. Nia lascé zoruch cosses da mangé o da puzené, ince sce l’intenziun podéss ester buna. Tl local dlungia él na gran lerch da lascé jö le patüc da mangé.
Pröma y secunda alzada
Tla pröma y secunda alzada él da ciafé indöt 6 ciamenes partides ete cun 1, 4 y 8 lec. Tl sotletët él surapró en “logher” olache i lec é posizioná sot finestres da tët. Chëstes impormët insciö da osservé les stëres denanco s’indormedí.
Pro i lec él da ciafé plomac y deches. Por podëi dormí val debujëgn da se tó para en sach da dormí (Schlafsack).
Tles alzades él ince les dusces cun ega cialda (da scialdé três le forgoré a lëgna te ciasadafüch).