Por podëi garantí che düc se stái saurí tla Ütia de Pütia, val debojëgn da respeté chësc regolamënt dla ciasa.
La Cöra dl Dom da Balsan y le Sorvisc ai Jogn Val Badia Ves dá le bëgngnü tla ciasa „Ütia de Pütia“!
Por che düc i ghësć y i vijitadus se stais saurí te chësta ciasa, éle debojëgn da tigní ite valgönes regoles y da avëi les informaziuns plü importantes che reverda la ciasa. Porchël él da ciafé chiló dessot les informaziuns plü importantes por la ciasa y la contrada.
La tlé
Por la surandada dla tlé, prëibel contaté le vardian dla ciasa responsabl, Paul Riegler sot al numer 348 7611246 (má cina otober) o Lois Turnaretscher sot al numer 349 375 8938 (novëmber cina aurí) almanco 5 dis dan le mëteman dla sojornanza. Canche i rovëis adalerch te ciasa Ves darále le begngnü y Ves mostrará la ütia y les funziuns plü importantes.
Forza eletrica
L’ automat prinzipal é da ciafé dan la porta d’entrada. Le sciolter general é da ciafé tl porte dl’ entrada (a man dërta, dlungia la porta d’entrada). L’ armé de segurëza é da ciafé tl local dl implant da scialdé. Daite y ince defora dala ciasa éle da ciafé n gröm de löms. Prëibel metede averda che les löms ne verdi nia por nia y che ares vëgnes destodades denanche jí a dormí. Sce i jëis fora de ciasa destodé dötes les löms y ince i atri injins che adora forza eletrica.
Ega
Prëibel sparagné ega. Ince da fá la duscia desson sparagné le plü ch’ ara vá ega, deache pornanche l’ega cialda é rovada mëssera indô gní scialdada sö cun le fur a lëgna.
Implant de scialdamënt
Cun n frogoré a lëgna pol gní scoaldé l’ega te ciasadafüch y metü da jí l‘ implant da scialdé ia por tera.
Tl local di seminars y te stüa éle da ciafé furs cun pellets. Prëibel sparagné pellets. Chisc é da ciafé te sgabuzin. Les ciamenes y les dusces vëgn scialdades cun panei a strom. Lascé jí chëstes le manco ch’ ara vá deache la forza eletrica é dër cera.
Füch
Te na ciasa che é fata en gran pert de lëgn, é le füch n gran prigo. Tles ciamenes da dormí ne póle porchël verde degöna flama (dit plü avisa no ciandëres y gnanca scossus (Feuerzeuge).
Te döta la ciasa éle rigorosamënter proibí da fumé.
Ciamenes da durmí
La sojornanza é consentida por alplü 25 porsones che stá dailó suranöt! Vigni vijitadú/dëssa é perié/ada da se tó n sach da durmí impara. Ia por le dé póle ester te ciasa alplü 40 porsones.
Ciasadafüch
Te ciasadafüch éle n frogoré a lëgna, na plata a induziun, n furn a strom, na frescara. Taís , pestech y fanes é danman por 40 porsones.
Aredamënt
I injins de aredamënt dla ciasa (armá, mëses, scagns, madroc y i.i.) ne pó nia gní portá alaleria. Al n‘é nia consentí da sposté la mobilia che é fissada (p. ej. i armá) o da i trasporté te d’atri locai. Implü vëgnel avisé te na manira rigorosa che les finestres tles alzades dessura pó madër gní ardurjades y nia davertes daldöt. Ince mëte pe sön le tët é proibí defin.
Mangiaria
I grups mëss se tó cun vëi döt ci che ai adora da mangé y ala fin dla sojornanza ne póle gní lascé zoruch degöna mangiaria.
Ciomënt
Döt le ciomënt mëss indô gní tut impara dai grups. Por le ciomënt bio éle a desposiziun a man ciampa dla ciasa na büja dlungia la si.
Cufer dl pröm aiüt
Por les situaziuns d’ emergënza éle n cufer de pröm aiüt da ciafé te ciasadafüch. Dailó éle laite les cosses plü importantes che an adora. Al vëgn parié da baraté fora le patüc che an á adoré sö.
Romené sö
Döt ci che é scrit sö sön la lista de control por le romené sö, messas ester a post canche i rovëis adalerch. Sce al n’é chësc nia le cajo, spo informede le vardian de ciasa.
Les medemes cosses vëgn controlades denanche os s’un jëis indô. Por na sogüda, fajesse na roda fora por la strotöra cun le vardian de ciasa.
Canche an é daite dal entrada dla ciasa pon mâ plü rodé cun scofuns. Prëibel lascede zoruch la ciasa nëta y romenada sö, por che le grup che vëgn dô da os póis ince se sté saurí laite. Les masaries por puzené é da ciafé te magasin. Le patüc da puzé y le papir de tloset éle vigni grup che mëss se tó impara.
Sce la ciasa ne vëgn nia lasciada zoruch nëta, vëgnel metü lapró sön le cunt n import de netijia de 100,00 Euro.
Danns/cauziun
Sce n grup gaujëia n dann mëss chësc te vigni cajo gní comuniché al vardian dla ciasa de competënza, por che i podunse jí inant cun la reparaziun. I cosć dl dann ti vëgn metüs en cunt al grup che l‘á gaujé.
Scrizorné sö por i murs y i lec é daldöt proibí y vëgn controlé dô da vigni sojornanza. Sce al ne vëgn nia tigní ite, vëgnel metü lapró sön le cunt 500,00 €.
Baiéde porchël atira da mëte man dla sojornanza cun üsc/ostes responsabli/bles dl grup y i mituns/i jogn.
Cun la prenotaziun vëgnel ghiré 300,00 Euro de cauziun, che vëgn paiada zoruch ala fin dla sojornanza, tan inant che al é döt apost.
Informaziuns implü
Sënza autorisaziun di proprietars di grunc vijins ne pón nia ciapé ite ti prá tla vijinanza. Tratan les escursciuns, les gites y le jí a pé éle da tigní ite dötes les regoles che vêl ti parcs naturai dla Provinzia da Balsan.
Plaza da parché
Sciöche plaza da parché éle a desposiziun d’inver la plaza sön le Jú de Börz. D’isté éle poscibl da jí cun alplü 2 auti cina dan la ciasa.
Alaleria
Tla plaza alaleria, dan la ciasadafüch, éle da ciafé n post por fá füch da ciamp (Lagerfeuer). La lëgna che vëgn adorada mëss gní coiüda adöm da os instësc te bosch.
Rëi por le fonin
L’adoranza dl fonin é limitada te ciasa. Dan dala ciasa y dl vers cuntra Börz é la rëi buna.
Misciuns de importanza y numeri de telefon
Vardian dla ciasa
Riegler Pauli 348 7611246 (de má cina d‘otober)
Castlunger Carlo 380 5049909 (de novëmber cina d‘aurí)
Numer d‘emergënza: 112
Dotur de basa de Comun Dot. Eduard Agreiter
Str. Pinis 43; 39030 San Martin de Tor; Tel: 0474 523315
Apoteca a Picolin/San Martin de Tor
Str. Picolin. 41; 39030 San Martin de Tor; Tel: 0474 523020
Comun de San Martin de Tor
Str. Tor. 25; 39030 San Martin de Tor; Tel: 0474 523125
Sorvisc ai Jogn Val Badia
Str. Picolin 22; 39030 San Martin de Tor; Tel: 0474 523070
Cöra dl Dom da Balsan:
Pfarrplatz 27; 39100 Balsan; Tel: 0471 978676 (348-7611246 Riegler Pauli)